საქართველო, 4 ნოემბერი, საქინფორმი მოსამართლე თამაზ ურთმელიძემ საქმეზე, ქიბარ ხალვაში რუსთავი 2-ის წინააღმდეგ, გადაწყვეტილება გუშინ საქალაქო სასამართლოში გამოაცხადა. ურთმელიძემ ქიბარ ხალვაშის სარჩელი ნაწილობრივ დააკმაყოფილა. "რუსთავი 2-ის" წილის 60% მან ქიბარ ხალვაშს, 40% კი ხალვაშის კუთვნილ კომპანია "პანორამას" გადასცა.

მოსამართლემ არ დააკმაყოფილა ქიბარ ხალვაშის მოთხოვნა საავტორო უფლებებთან დაკავშირებით.

საქმეზე, ქიბარ ხალვაში რუსთავი 2-ის წინააღმდეგ, არსებითი განხილვები 19 ოქტომბერს დაიწყო, პირველი მოსამზადებელი სხდომა კი 17 სექტემბერს გაიმართა.

საქმის განმხილველი მოსამართლე ძირითად შემთხვევაში არ აკმაყოფილებდა რუსთავი 2-ის და TV საქართველოს იურისტების შუამდგომლობებს.

ამავე დროს მოსამართლემ სასამართლო დარბაზიდან პროცესის დასრულებამდე „რუსთავი 2“-ის გენერალური დირექტორი ნიკა გვარამია გააძევა. იურისტების რამდენიმე შუამდგომლობის მიუხედავად ურთმელიძე ნიკა გვარამიას პროცესზე დასწრების წინააღმდეგი იყო და შუამდგომლობებს არ აკმაყოფილებდა.