"პრაიმთაიმის" ოფისში "სუხიშვილების" სამხატვრო ხელმძღვანელმა ნინო სუხიშვილმა და ორგანიზატორმა დავით ოქიტაშვილმა სუხიშვილების საახალწლო კონცერტთან დაკავშირებით პრესკონფერენცია გამართეს და ჟურნალისტების შეკითხვებს უპასუხეს. სუხიშვილების კონცერტი 23-25 დეკემბერს ფილარმონიის დიდ საკონცერტო დარბაზში ჩატარდება. ანსამბლი მაყურებელს ახალ პროგრამას შესთავაზებს. პირველ ცეკვაში გამოყენებული იქნება 40 სოლო. შეგახსენებთ, რომ სუხიშვილებს დაახლოებით ''ხორუმის'' შვიდი ვერსია აქვთ, საახალწლო პროგრამაში კი მაყურებელი ''ხორუმის'' ახალ ინტერპრეტაციას იხილავს.

"საშობაო საახალწლო კონცერტებს ჩვენ ყოველ წელს ვმართავთ და ყოველ ჯერზე განსხვავებულად წარვსდგებით მაყურებლის წინაშე. ამჯერადაც პროგრამა განსხვავებულად შევკარით. ჩვენ მაყურებელს ''ხორუმის'' ახალ ვერსიას ვთავაზობთ. ეს არის მონუმენტური ცეკვა," - განაცხადა ნინო სუხიშვილმა. ასევე, პროგრამაში კლასიკურ-ტრადიციული ცეკვებიც იქნება. ფილარმონიის სცენაზე ძალიან ბევრი ახალი მოცეკვავე წარსდგება. "ჩვენ წელს გვქონდა კასტინგი, საიდანაც ავიყვანეთ ბევრი ახალი მოცეკვავე და ამ ახალ ცეკვაში 50-ზე მეტი მოცეკვავეა დაკავებული," – განმარტა ანსამბლის სამხატვრო ხელმძღვანელმა. ბილეთი 10-დან 35 ლარამდე ეღირება.