საზოგადოება
კვალიფიკაციის ასამაღლებლად საქართველოში ჩამოსული ინგლისურის მასწავლებლები ფულს აქეთ უნდა გვიხდიდნენ!

ben_glikmani

საქინფორმი არაერთხელ ესაუბრა მკითხველს ინგლისური ენის მასწავლებლების ჩამოსვლის თაობაზე, ხოლო გუშინ ჩვენთვის ცნობილი გახდა ამერიკული კორპორაცია “Footprintsrecruiting”-ის საიტზე გამოქვეყნებული სტატიის შესახებ, სადაც Footprintsrecruiting-ის თანადამფუძნებელი და ხელმძღვანელი - ბენ გლიკმანი იმ 1000 ინგლისური ენის მასწავლებელზე საუბრობს, რომლებიც საქართველოში სიამაყით ჩამოიყვანეს.

სტატიიდან ვიგებთ, რომ აღნიშნულ მასწავლებლებს არანაირი პედაგოგიური გამოცდილება არ მოეთხოვებათ, ისევე, როგორც დიპლომი და ინგლისურენოვანი ქვეყნის მოქალაქეობა! აღმოჩნდა, რომ ეს ახალბედა მასწავლებლები ჩვენს ქვეყანაში არა ბავშვების აღსაზრდელად, არამედ გამოცდილების მისაღებად ჩამოვიდნენ.

ბენ გლიკმანი მათ ხელფასებზეც წერს: „ 500 ლარი, რაც მათი ანაზღაურებაა, საკმაოდ ცოტაა დასავლურ სტანდარტებთან შედარებით,მაგრამ სამაგიეროდ, მათ აქვთ უფასო ცხოვრება და, რაც მთავარია, ისინი იძენენ გამოცდილებას“. გამოდის, რომ არაკომპეტენტურმა და გამოუცდელმა უცხოელებმა მადლობა აქეთ უნდა გადაგვიხადონ, ჩვენი შვილების აღზრდას რომ ვანდობთ, და, წესით, ფულსაც აქეთ უნდა იხდიდნენ კვალიფიკაციის ამაღლებაში.