საქართველო, 23 სექტემბერი, საქინფორმი. BBC-ის გადაცემა HARDtalk-ის წამყვანმა საქართველოს თავდაცვის მინისტრს ორგანიზაცია „კავკასიის კვლევითი ცენტრის“ მიერ რამდენიმე წლის წინ საქართველოში ჩატარებული საზოგადოებრივი აზრის გამოკითხვის შედეგები შეახსენა, რომლის თანახმადაც, საქართველოს მოსახლეობის მხოლოდ 65%-მა დაუჭირა მხარი ალიანსში საქართველოს ინტეგრაციას. თინათინ ხიდაშელმა განაცხადა, რომ ინფორმაცია არ შეესაბამება სიმართლეს, რადგან „ცენტრმა“ ბოდიში მოიხადა, კვლევის წარმოების დროს დაშვებული შეცდომის გამო.

„ინტერვიუს აღების დროს ევროკავშირი და ევრაზიული კავშირი ერთმანეთში აირია. ხალხის 65% საკმაოდ დიდი რაოდენობაა. არ არის სიმართლე, თითქოს საქართველოს მოსახლეობას არ აინტერესებს საქართველოს ნატოში ინტეგრაცია, პირიქით, ეს მათთვის ერთ-ერთი მთავარი პრიორიტეტია. უბრალოდ, ეს ხალხი თავს გრძნობს იმედგაცრუებულად, რადგან აღარ სჯერა, რომ ეს მოხდება ახლო მომავალში. საქართველოში არ შეიმჩნევა რუსეთის მომხრეთა რაოდენობის ზრდა. რაც საქართველოში ხდება, ეს არის რწმენის დაკარგვა ევროკავშირისა და ნატოს მიმართ. ეს არ ნიშნავს იმას, რომ საქართველო რუსეთის მომხრეთა რიგებში ეწერება... ჩემი თაობა, რომელიც უმთავრეს სამუშაო ძალასა და საარჩევნო მასას წარმოადგენს საქართველოში, ის ხალხია, რომლებმაც საკუთარ თავზე გამოსცადეს რუსული აგრესია...“.