საქართველო, 18 სექტემბერი, საქინფორმი. მოსკოვში განიხილავენ სირიის ხელისუფლების მიმართვას სამხედრო დახმარების შესახებ, - განაცხადა  რუსეთის ფედერაციის პრეზიდენტის პრესმდივანმა დიმიტრი პესკოვმა.

„თუ იქნება მიმართვა, მაშინ ორმხრივი კონტაქტების, ორმხრივი დიალოგის ფარგლებში, რა თქმა უნდა, მას განიხილავენ და იმსჯელებენ", - განუცხადა მან ჟურნალისტებს სირიის საგარეო საქმეთა მინისტრი ვალიდ მუალემის განცხადების კომენტირებისას, რომ  მისი ქვეყნის ხელისუფლებამ შესაძლოა შესაბამისი თხოვნით რუსეთს მიმართოს.

უწინ  დასავლეთის რამდენიმე ქვეყანა მოსკოვს ასადის რეჟიმისთვის იარაღის მიწოდებაში ადანაშაულებდა, რაზეც რუსეთის მხარემ განაცხადა, რომ მხოლოდ ახორციელებს უწინ გაფორმებულ კონტრაქტებს და, შესაბამისად, არავითარ კანონს არ არღვევს.

გარდა ამისა, რუსეთის ფედერაციის ხელისუფლებამ არაერთხელ განაცხადა, რომ რუსეთს არ გაუგზავნია სამხედრო კონტინგენტი სირიაში. იქ მყოფი სპეციალისტები ეხმარებიან სირიელ კოლეგებს მიწოდებული ტექნიკის გამოყენებაში, რაც ასევე არ წარმოადგენს საერთაშორისო სამართლის ნორმების დარღვევას.