აქტუალური
ირმა ინაშვილი - „რეპუბლიკელების“ წინააღმდეგ: „ბრძოლა ჩემთვის ორმაგად საამაყოა იმიტომ, რომ არჩევნებში დასახელებული ვარ „პატრიოტთა ალიანსის“ მიერ და არა პოლიტიკურად გაკოტრებული „ქართული ოცნებისგან“!
საქართველო, 3 სექტემბერი, საქინფორმი. „საქართველოს პატრიოტთა ალიანსის“ გენერალური მდივანი ირმა ინაშვილი კოალიცია „ქართული ოცნების“ განცხადების საპასუხოდ ავრცელებს განცხადებას, სადაც, კერძოდ, ნათქვამია:
„გაკვირვებული ვარ კოალიცია „ქართული ოცნების“ განცხადებით იმის შესახებ, თითქოს მე, „საქართველოს პატრიოტთა ალიანსის“ გენერალური მდივანი და საგარეჯოს საარჩევნო ოლქში მაჟორიტარი დეპუტატობის კანდიდატი, ამომრჩევლებში ვავრცელებ განცხადებებებს, რომ „ქართული ოცნება“ საგარეჯოს ოლქში მხარს მე, ირმა ინაშვილს მიჭერს.
კოალიცია „ქართული ოცნებისაგან“ კატეგორიულად მოვითხოვ,- საზოგადოების წინაშე საჯაროდ და კონკრეტულად განმარტოს, თუ სად და როდის გამოვთქვი მსგავსი მოსაზრებანი. ჩემს შეხვედრებს სოფლებში უამრავი ადამიანი ესწრება და ნებისმიერი მათგანი დაადასტურებს, რომ ასეთი განცხადება არც საჯაროდ, არც კულუარულად, არც ღიად და არც ფარულად არ გამიკეთებია!
მე დარწმუნებული ვარ, რომ ამ აბსურდული და პოლიტიკური თვალსაზრისით, აბსოლუტურად არაკორექტული განცხადების ინიციატორი და “შემოქმედი” ჩემი კონკურენტი რესპუბლიკური პარტიაა“, - აღნიშნულია, კერძოდ, ირმა ინაშვილის განცხადებაში.
