საქართველო, 18 აგვისტო, საქინფორმი. „ალია“-ს ინფორმაციით, „ნაციონალური მოძრაობის“  ცნობილი სახეები  ზაფხულის  ცხელ დღეებს  მსოფლიოს სხვადასხვა  ქვეყნის  ფეშენებელურ კურორტებზე ატარებენ.

„12 აგვისტოს „ნაცბანდელთა“ წრეებში ცნობილი გახდა, რომ მათი ლიდერები დასასვენებლად მსოფლიოს ძვირად ღირებულ კურორტებზე გაემგზავრნენ და სწორედ ამაზე ამტყდარა ერთი ვაი-ვიში: ნახეთ, ხალხო, ჩვენ ლამის შიმშილით სული გაგვძვრეს, ესენი კიდევ უცხოეთში დაბრძანდებიანო. მაგალითად, ინკოგნიტო წყარო ამბობს, უკვე ცნობილია, რომ მიხეილ მაჭავარიანი თავის ოჯახთან ერთად პარიზში გაემგზავრა, გიგა ბოკერია თავის კნეინა თამარ ჩერგოლეიშვილთან ერთად დროს გაატარებს ლონდონში, ხოლო „ნაციონალების“ სულიერი დედა ირმა (ნურსა) ნადირაშვილი ორი კვირის განმავლობაში თურქეთის პლაჟებს „დალაშქრავს“.

წყაროს ინფორმაციით, ქვეყნიდან გასასვლელად ემზადებიან „ნაცბანდის“ სხვა ლიდერებიც, მაგრამ ამჯერად მხოლოდ ეს სამი ოჯახი უნახავთ თბილისის საერთაშორისო აეროპორტში.

სხვათა შორის, „ნაცმოძრაობაში“ ერთადერთი გიორგი ვაშაძე დარჩა, რომელმაც ხონში სააკაშვილის მომხრე ბავშვებისთვის საზაფხულო ბანაკი მოაწყო, მაგრამ აქაც შარში გაეხვია – ბანაკში სხვადასხვა რაიონიდან ჩასულებს შორის დაპირისპირება მოხდა. ყოფილან დაშავებულები და ტრავმირებულებიც, რომლებიც საავადმყოფოებში მოათავსეს, მაგრამ „ნაცებს“ ყველაფერი დაუმალავთ. თავად გიორგი ვაშაძემ კი თავი გაიგიჟა, ბანაკში არაფერიც არ მომხდარა, ისე ვერთობით, მეტი არ შეიძლებაო.

როგორც წყარო ამბობს, დავით კეზერაშვილის მიერ გამოგზავნილი ფულით ლიდერები სარგებლობენო. მიშას უთქვამს, ცოტა „ქამრები მოიჭირეთ“, მასობრივი „გულავი“ მაშინ იქნება, როცა საქართველოში დავბრუნდებიო, მაგრამ, როგორც ჩანს,  „ქამრების მოჭერა“ მარტო აქტივისტებს შეეხოთ. როგორც უკვე აღვნიშნეთ, ირმა ნადირაშვილი ოჯახთან ერთად, თურქეთში გამგზავრებულა, მაგრამ მანამდე ოდესაში ისვენებდა. პრინციპში, ეს „სამუშაო დასვენება“ უფრო იყო, რადგან შეფს მისთვის ახალი დავალებები მიუცია – სექტემბრის შუა რიცხვებიდან აუცილებლად უნდა დაიწყონ პროვოკაციული გამოხტომები, კარბელაშვილისა და ბარამიძის დონეზე ვერ დარჩებიან“, – წერს გამოცემა.

ამავე წყაროზე დაყრდნობით:  „სექტემბრიდან, როცა სხვა ლიდერები თბილისში დაბრუნდებიან და მუშაობას შეუდგებიან, „დასიცხული“ საშუალო და დაბალი რგოლებიც გეგმავენ აჯანყებას, ოღონდ შიგნითვე – „ნაციონალურ მოძრაობაში“,-  წერს  „ალია“.