საქართველო, 23 ივლისი, საქინფორმი. მთავარი პროკურატურა ავრცელებს განცხადებას, სადაც,  ნათქვამია, რომ პროკურატურამ მოქალაქეთათვის ქონების იძულებით ჩარმოთმევის მორიგ 5 ფაქტზე დაასრულა გამოძიება, რის შემდეგაც შესაძლებელი გახდა 5 დაზარალებულის დარღვეული უფლებების აღდგენა.

„პროკურატურის შემაჯამებელი გადაწყვეტილების საფუძველზე, ეკონომიკისა და მდგრადი განვითარების სამინისტროს ინიცირებით და მთავრობის განკარგულებით, დაზარალებულ გივი თოდაძეს გადაეცა „რენჯ როვერი“-ს და „კრაისლერი“-ს მარკის ავტომობილები; დაზარალებულ გიორგი რეხვიაშვილს გადაეცა “მერსედეს-ბენც ML 350” და “ჰიუნდაი სონატა”-ს მარკის ა/მანქანები, ხოლო შმაგი რატიანს და პარსამ ზალინიანს გადაეცათ „ფოლკსვაგენ პასატი“ ფირმის ორი ა/მანქანა. ხსენებული ა/მანაქანები, 2010-2011 წლებში, ცალკეული საჯარო მოხელეების დანაშაულებრივი ქმედების შედეგად, საპროცესო შეთანხმების გაფორმების სანაცვლოდ, იძულებით იქნა მათ მიერ შესყიდული.

დაზარალებულ ივანე მახარაშვილს, პროკურატურის შემაჯამებელი გადაწყვეტილების საფუძველზე, უძრავი ქონების პრივატიზებასთან დაკავშირებული პროცედურების დასრულების შემდეგ, გადაეცემა სოფელ დიღომში მდებარე 1020 კვ.მ. არასასოფლო-სამეურნეო დანიშნულების მიწის ნაკვეთი, რომელიც დაზარალებულს უკანონოდ დაათმობინეს საპროცესო შეთანხმების გაფორმების სანაცვლოდ.