ზუგდიდის მე-4 საჯარო სკოლაში, სადაც ისევ ხელშეუხებლად მოღვაწეობს ''საპატიო სტუმარი'' თომას ფლეთჩერი, როგორც იქნა, დანიშნეს ახალი დირექტორი ნათია ხუფაცარია (ისევ ქალბატონი), რომელიც ზუგდიდის პირველი საჯარო სკოლის ყოფილი დირექტორის, ზუგდიდის საგანმანათლებლო რესურს-ცენტრის ხელმძღვანელ აზა ჯოჯუას მეგობრის - მედიკო ქარდავას ქალიშვილია და ამიტომაც იმასაც ამბობენ, რომ ნათია ხუფაცარია მალე პირველი საჯარო სკოლის დირექტორიც გახდებაო.

მე-4 საჯარო სკოლის უკვე ყოფილი დირექტორი ხათუნა დარასელია, გავრცელებული ვერსიით, აზა ჯოჯუას მოადგილე გახდებაო. ხათუნა დარასელიას გადაყვანა თუ გათავისუფლება მოსალოდნელი იყო. ჯერ იყო და, მე-4 საჯარო სკოლაში შემდგარი გასაიდუმლოებული შეხვედრის (ფლეთჩერისა და შაშკინის) ამსახველი სურათები ოპოზიციონერ კახა მიქაიას ჩაუვარდა ხელში, მერე კი ხათუნა დარასელიამ სრულიად უმიზეზოდ სამსახურიდან გაათავისუფლა 7 პედაგოგი.

სამეგრელო-ზემო სვანეთის გუბერნატორის - ზაზა გოროზიას სურვილით, ზუგდიდის მე-10 და მე-4 საჯარო სკოლების დირექტორებს ადგილები უნდა გაეცვალათ, მაგრამ ზუგდიდის მე-10 სკოლის პედაგოგებმა, მშობლებმა, მოსწავლეებმა და მათმა ახლობლებმა ხათუნა დარასელია სკოლაში არ შეუშვეს.