საზოგადოება
სოფო შევარდნაძე: „ედუარდ შევარდნაძე განსაკუთრებულ პატივისცემას გამოხატავდა და უპირობო მხარდაჭერას უცხადებდა ბიძინა ივანიშვილის საქმიანობას“
საქართველო, 7 ივლისი, საქინფორმი. ედუარდ შევარდნაძის შვილიშვილი, ჟურნალისტი სოფო შევარდნაძე ინტერნეტში გავრცელებულ ცრუ ინფორმაციასთან დაკავშირებით განცხადებას ავრცელებს. საუბარია ინფორმაციაზე, რომელიც თითქოსდა ედუარდ შევარდნაძის ანდერძს ეხება და მას სოფო შევარდნაძე ასაჯაროვებს.
„ერთი წლის წინ, ზუსტად ბაბუაჩემის გარდაცვალებიდან რამდენიმე დღის შემდეგ, დაიდო ეს ინტერვიუ წერილთან დაკავშირებით, რომლის შესახებაც მე დავწერე: მთელი კატეგორიულობით ვაცხადებ, რომ არც ერთი სიტყვა არ შეესაბამება სიმართლეს; ამაზრზენია, როდესაც ჩემი ოჯახისთვის უმძიმეს დღეებში, არსებობენ ჟურნალისტები ან მავანნი და მავანნი, რომლებიც სპეკულირებენ ბაბუაჩემის გარდაცვალების თემით. რაც შეეხება ბიძინა ივანიშვილს, არავისთვის საიდუმლო არ ყოფილა ედუარდ შევარდნაძის დამოკიდებულება ამ პიროვნების მიმართ; ადრეც და შემდგომაც ის განსაკუთრებულ პატივისცემას გამოხატავდა და უპირობო მხარდაჭერას უცხადებდა მის საქმიანობას. განსაკუთრებული მადლიერი იყო მისი იმ გადამწყვეტი წვლილისთვის, რაც მას სამების ტაძრის მშენებლობაში მიუძღვის. ვთხოვ ჩემს ყველა კოლეგა ჟურნალისტს და საიტების რედაქტორებს, ჩემი ოჯახისთვის ამ მძიმე და რთულ დროს, თავი შეიკავონ ცრუ და თვითნებური ინფორმაციის გავრცელებისგან. გთხოვთ, ის ამაზრზენი, ე.წ. ინტერვიუ, რომელიც გავრცელდა ინტერნეტის მეშვეობით, მოხსნათ თქვენი საიტებიდან. წინასწარ გიხდით მადლობას ჟურნალისტური სოლიდარობისთვის”. მე მაშინ მივმართე კოლეგებს, მოეხსნათ ეს ამაზრზენი მასალა საიტებიდან. ახლაც ასეთი თხოვნით მივმართავ. თუ გაგრძელდება ამ ცრუ ინფორმაციის ტირაჟირება, არ დავიზარებ და მივმართავ სამართლებრივ გზებს”,- აღნიშნულია, კერძოდ, შევარდნაძის განცხადებაში. 
