საქართველო, 30 აპრილი, საქინფორმი. ახალქალაქის საინფორმაციო ცენტრმა - „საქართველო - ევროპული და ევროატლანტიკური ინტეგრაცია“ ახალქალაქის მუნიციპალიტეტის 10 სკოლის 20 მასწავლებლისათვის ტრენინგი ჩაატარა თემაზე „ნატო და საქართველო“. პროექტის ფარგლებში „ნატოს კვირეული ახალაქალაქში“, 2015 წლის 26 აპრილს, ახალქალაქის მუნიციპალიტეტის სკოლების მასწავლებლებმა მონაწილეობა მიიღეს ტრენინგში, რის შემდეგაც ისინი დასაჩუქრდნენ წიგნები-სილაბუსებით, რომლებიც შემუშავდა და გამოქვეყნდა მეცადინეობების ჩასატარებლად (კლასის ხელმძღვანელის საათი), პროექტის ფარგლებში. ტრენინგი უქმე დღეს ჩატარდა, რათა ხელი არ შეშლოდა სკოლებში სასწავლო პროცესს.

ტრენინგში მონაწილე მასწავლებლებმა აღნიშნეს ის მომენტები, რომლებიც მათ განსაკუთრებულად მოეწონათ. „კარგია, რომ ვასწავლით ბავშვებს, როგორ იმუშაონ სხვადასხვა მედიის წყაროებთან. ისინი ისწავლიან ინფორმაციის სწორად აღქმას, სიმარტლის სიცრუისგან გარჩევას - იმ საბაზო ცოდნის საფუძველზე, რომლებსაც სკოლებში იღებენ“, - აცხადებენ ტრენინგის მონაწილენი.

„ამ მეთოდიკის გამოყენება სხვა გაკვეთილების დროსაც შეიძლება, რადგან ის საშუალებას აძლევს ბავშვებს, დამოუკიდებლად გააანალიზონ ესა თუ ის სიტუაცია ინფორმაციის ალტერნატიული წყაროების საფუძველზე“, - დასძინა სხვა მასწავლებელმა.

პროექტის უკვე მეორე ეტაპზე მასწავლებლები ჩაატარებენ მეცადინეობას „ნატო და საქართველო“. ასევე დაგეგმილია მოსწავლეთა და მასწავლებელთა გამგზავრება თბილისსა და გორში, სადაც მათ სხვადასხვა შეხვედრას მოუწყობენ. პროექტის ფარგლებში გამოცხადებული იქნა ნახატების კონკურსი „ჩემი თვალით დანახული ნატო“ და თხზულება „წერილი ჯარისკაცს“ ახალქალაქის მუნიციპალიტეტის 10 სკოლაში. პროექტის დასასრულს გამოფენაზე წარმოდგენილი იქნება მოსწავლეთა 200 ნახატი, საიდანაც 20 საუკეთესოს შეარჩევენ. ასევე შეირჩევა 20 საუკეთესო „წერილი ჯარისკაცს“. საუკეთესო ნახატებისა და წერილების ამსახველი ღია ბარათები საჩუქრად გადაეცემათ სამხედრო აკადემიის კურსანტებს, ასევე გაეგზავნებათ ქართველ ჯარისკაცებს, რომლებიც ავღანეთში მსახურობენ. 10 სკოლიდან პროგრამისთვის შერჩეული მოსწავლე სამხედრო აკადემიაში გაემგზავრებიან იქ სწავლის პროცესის გასაცნობად, რის შემდეგაც ინფორმაციას თავის სკოლებში გაუზიარებენ.