საქართველო, 22 აპრილი, საქინფორმი. მთავარი პროკურატურა „დეპუტატ ვალერი გელაშვილზე თავდასხმის ფაქტზე მ. სააკაშვილის ბრალთან დაკავშირებით ავრცელებს განცხადებას, სადაც, კერძოდ, ნათქვამია: „მიხეილ სააკაშვილს ბრალი წარდგენილი აქვს საქართველოს სისხლის სამართლის კოდექსის 333-ე მუხლის მე-3 ნაწილის „ბ“ქვეპუნქტით, რაც გულისხმობს სახელმწიფო-პოლიტიკური თანამდებობის მქონე პირის მიერ, სამსახურებრივი უფლებამოსილების გადამეტების ჩადენას ძალადობით და იარაღის გამოყენებით... ასევე,  25 და 117-ე მუხლის მეხუთე ნაწილის „ე“ ქვეპუნქტით, რაც გულისხმობს ჯგუფურად ჯანმრთელობის განზრახ მძიმე დაზიანების ორგანიზებას.

დანაშაულის ჩადენის დროს, ანუ 2005 წლის 14 ივლისს, მოქმედი კანონის მიხედვით, ჯგუფურად ჯანმრთელობის განზრახ მძიმე დაზიანება სასჯელის სახედ და ზომად ითვალისწინებდა თავისუფლების აღკვეთას ვადით 5-დან 12 წლამდე და განეკუთვნებოდა განსაკუთრებით მძიმე დანაშაულთა კატეგორიას. დღეს მოქმედი რედაქციით კი იგივე ქმედება განეკუთვნება მძიმე დანაშაულთა კატეგორიას და ისჯება თავისუფლების აღკვეთით 7-დან 9 წლამდე ვადით.