საქართველო, 15 აპრილი, საქინფორმი. გაზეთ „ასავალ-დასავალის" ჟურნალისტი დიტო ჩუბინიძე მზადაა, რესპონდენტ შალვა აბულაძის შესახებ ისაუბროს, თუმცა, მოითხოვს, რომ მამუკა ხაზარაძეც დაიკითხოს პროკურატურაში.

„მივმართავთ მამუკა ხაზარაძეს, ბადრი ჯაფარიძესა და პაატა ღაძაძეს, რომელიც ამ რამდენიმე დღის წინათ ლავრენტი ბერიას პენსნეთი გამოგვეცხადა და ენის ბორძიკით ძლივს ჩაიკითხა „თიბისი ბანკის" საგანგებო განცხადება - აქაოდა, ჟურნალისტ დიტო ჩუბინიძესა და ორი პოლიციელის მკვლელობაში ბრალდებულ შალვა აბულაძეს შორის კავშირი გამოარკვიეთ და ჩუბინიძე დაჰკითხეთო!

ბატონებო, დაკითხვისთვის კი არა, ყარა-ყორუმში ჩასასვლელად ვარ მზად და ის, რაც ჩემმა რესპონდენტმა - ძებნილმა შალვა აბულაძემ საგაზეთო ინტერვიუებში განმიცხადა, შემიძლია, სიტყვასიტყვით გავიმეორო,მაგრამ მაინტერესებს, როდის გამოიძახებთ პროკურატურაში და როდის დაჰკითხავთ მამუკა ხაზარაძეს იმ საქმეების გამო, რომლებზეც გამოძიება უკვე დასრულებულია?!