ქუთაისის მოსწავლე-ახალგაზრდობის სასახლე კუთვნილი შენობიდან სამხატვრო სკოლის შენობაში გადავიდა. როგორც საქინფორმის კორესპონდენტმა გაარკვია, სასახლის შენობას კონტროლის პალატის მესვეურებმა დაადგეს თვალი და შესაბამისი სარეკონსტრუქციო სამუშაოების შემდეგ იქ დაბინავდებიან. სხვა ინფორმაციით, მოსწავლე-ახალგაზრდობის შენობაში ერთ-ერთი ჯერჯერობით უცნობი სამთავრობო უწყება გადავა. ინფორმაციას ოფიციალურად არავინ ადასტურებს, თუმცა ფაქტია, მოსწავლე-ახალგაზრდობის სასახლის ინვენტარი და აღჭურვილობა სამხატვრო სკოლის შენობაშია გადატანილი. როგორც ქუთაისის მოსწავლე-ახალგაზრდობის სასახლის დირექტორი ზაზა ლეკვეიშვილი აცხადებს, ისინი დროებით იკავებენ სამხატვრო სკოლის მესამე სართულს.
პიონერთა სასახლე ქუთაისში 1937 წელს გაიხსნა, 1949 წელს გამოიცვალეს შენობა და გაფართოვდნენ. 1954 წლის მაისში ოფიციალურად ეწოდათ პიონერთა და მოსწავლეთა სასახლე და გადაეცათ ახლანდელი მწერალთა კავშირის შენობა, ამ პერიოდისთვის ფუნქციონირებდა 50 წრე. მოგვიანებით, 1982 წელს, პიონერთა სასახლემ ბინა ახლადაშენებულ შენობაში დაიდო, ირაკლი აბაშიძის გამზირზე, და დღემდე იქ რჩება. იქ ამჟამად 380 ბავშვი სწავლობს. სასახლეში სწავლა უფასოა და იქ მისვლა ყველა ბავშვს შეუძლია.