საზოგადოება
ხადური: „ბიუჯეტის მხრიდან გაცვლით კურსზე დაწოლა არ არის. ინფლაციის მაჩვენებელი არის დაბალი“
საქართველო, 11 თებერვალი, საქინფორმი. ფინანსთა მინისტრი ლარის გაცვლით კურსზე საუბრობს. „ფინანსთა სამინისტროს მხრიდან იანვარში არ ყოფილა დაწოლა, ანუ ოპერაციულ დონეზე ბიუჯეტი იყო პროფიციტული, ანუ შემოსავლებმა გადააჭარბა ხარჯებს და უახლოესი თვეების განმავლობაში ეს ტენდენცია შენარჩუნებული იქნება იმ დედნის მიხედვით, რომელიც ჩვენ გვაქვს. ჩვენი მხრიდან, ბიუჯეტის მხრიდან გაცვლით კურსზე დაწოლა არ არის... ეროვნული ბანკი სიტუაციას აკონტროლებს და მიიღებს შესაბამის გადაწყვეტილებას", - განაცხადა ხადურმა.
ამასობაში კი ლარი გაუფასურებას განაგრძობს. საქართველოს ეროვნულმა ბანკმა ლარის ახალი ოფიციალური გაცვლითი კურსი დაადგინა, რომლის მიხედვითაც აშშ დოლართან მიმართებაში, ლარი ისევ გაუფასურდა. 10 თებერვლიდან 1 დოლარის შეძენა 2.0346 ლარად იქნება შესაძლებელი. ლარის ოფიციალური გაცვლითი კურსის ცვლილებამ ერთ დღეში 0.0039 ლარი შეადგინა. 
