საქართველო, 3 თებერვალი, საქინფორმი. საქართველოს პრეზიდენტის სარეზერვო ფონდის დაფინანსებითა და ხელშეწყობით განხორციელებული პროექტის „მოსამართლეთა სემინარები სასამართლოს დამოუკიდებლობის, გამჭვირვალობისა და მიუკერძოებლობის უზრუნველსაყოფად“ ფარგლებში, ასოციაცია „საქართველოს მოსამართლეთა ერთობის“ ორგანიზებით, სასამართლო დამოუკიდებლობისა და სამოსამართლო ეთიკის აქტუალურ საკითხებზე საერთაშორისო კონფერენცია გაიმართა.

კონფერენციაზე ფონდის მიერ დაფინანსებული პროექტების პრეზენტაციაც მოეწყო. აღნიშნული პროექტები იყო „მოსამართლეთა სემინარები სასამართლოს დამოუკიდებლობის, გამჭვირვალობისა და მიუკერძოებლობის უზრუნველსაყოფად“, „მართლმსაჯულების გაძლიერება“ და „იუსტიციის უმაღლესი სკოლის შესაძლებლობების გაძლიერება“. ამ პროექტების ფარგლებში უკვე განხორციელდა სტუდენტური კონფერენციები, შემუშავდა მოსამართლეთა სოციალური დაცვის გარანტიები, 44 მოსამართლისათვის გაიმართა სემინარები ავსტრიაში, გერმანიაში, სლოვაკეთსა და ლიტვაში.

„მოსამართლის დამოუკიდებლობის, მოსამართლის ღირსების გაძლიერება არის მნიშვნელოვანი საფუძველი სასამართლოს დამოუკიდებლობის გაძლიერებისათვის. ამ პროექტების მიზანიც სწორედ ეს იყო", - აღნიშნა პრეზიდენტის ადმინისტრაციის უფროსმა დავით პატარაიამ.