საქართველო, 26 იანვარი, საქინფორმი. ამის შესახებ ჟურნალისტებს საქართველოს ყოფილმა პრემიერ-მინისტრმა ბიძინა ივანიშვილმა განუცხადა. ექსპრემიერმა იური ვაზაგაშვილის მკვლელობის საკუთარ ვერსიებზეც ისაუბრა.

„ასეთი საშინელი და საზარელი რამ, ვისაც თავში მოუვიდა, მისი მიზანი იყო, მოწმეების დაშინება, ასევე, მათ მიზანს წარმოადგენდა გამოძიებისთვის ხელის შეშლა, რომ გადარჩენილიყვნენ ისინი, ვინც მონაწილეობა მიიღო იური ვაზაგაშვილის შვილის მკვლელობაში. მეორე ვერსია არის, რომ ამ ჯგუფს იმედი აქვს, ქვეყანაში გამოიწვევენ შანტაჟსა და არეულობას", - განაცხადა ბიძინა ივანიშვილმა. 
ამასთან, ყოფილმა პრემიერმა ისაუბრა მისი და იური ვაზაგაშვილის შეხვედრის დეტალებზე. „ტრაგედიამდე რამდენიმე დღით ადრე შევხვდი მას... გახარებული იყო უკრაინიდან ახალი მოწმეების გამოჩენით, რომლებიც ადასტურებენ გამოძიების ეჭვებს და პრაქტიკულად ვისზეც ეჭვი ჰქონდა პროკურატურას, ყველანი ხვდებოდნენ პასუხისმგებლობის ქვეშ. მან გვარებიც ბევრი დაასახელა", - განაცხადა ბიძინა ივანიშვილმა. 
რაც შეეხება ჟურნალისტების შეკითხვას, იური ვაზაგაშვილის განცხადებებზე, რომ მისი შვილის მკვლელობაში მონაწილეები ისევ თანამდებობებზე რჩებიან შსს-ში, ივანიშვილის თქმით, ისინი არათუ ამ თანამდებობებს დატოვებენ, არამედ მკაცრად აგებენ პასუხს კანონის წინაშე.