აქტუალური
მოკლული პოლიციელი და ლავას ოღლი - ვინ მფარველობს კრიმინალებს?
საქართველო, 30 დეკემბერი, საქინფორმი. საბოლოო ვერსია და დეტალები იმისა, თუ რა მოხდა 27-ი დეკემბრის ღამით ბათუმის კლუბ "ლეგასში" და რა გახდა 22 წლის კრიმინალური პოლიციის თანამშრომლის თარაშ მუკბანიანის მკვლელობის მიზეზი, ამ დრომდე უცნობია. მკვლელობაში ეჭვმიტანილი რამაზ დევაძე სამართალდამცავებმა სარფში საზღვრის გადაკვეთის მცდელობისას დააკავეს.
გამოცემა benewsbatumi-ის ინფორმაციით, დევაძეს მეგობრული ურთიერთობა აკავშირებს ე.წ. კანონიერ ქურდ მინდია გორაძესთან, იგივე "ლავას ოღლისთან". დევაძე გასულ ზაფხულს, 26 ივნისს, ბათუმის პოლიციის მე-5 განყოფილების თანამშრომელს პუშკინის ქუჩაზე სასტიკად გაუსწორდა. ამის შემდეგ კი თბილისიდან დასასვენებლად ჩამოსული პოლიციელები სასტიკად სცემა. გამოცემა benewsbatumi-ის ინფორმაციით, ორივე საქმეში საქართველოს შს მინისტრი ალექსანდრე ჭიკაიძე და აჭარის შსს სამმართველოს უფროსი თამაზაშვილი ჩაერია, რის შემდეგაც 2000-ლარიანი ჯარიმის სანაცვლოდ დევაძე გაათავისუფლეს. benewsbatumi-ის ინფორმაციით, რამაზ დევაძეს კრიმინალურმა ავტორიტეტმა ლავას ოღლიმ, “სპორტსმენ კრიმინალთა” ჯგუფის შექმნა დაავალა, რომელიც აღნიშნულ დანაშაულებებს დევაძის ხელმძღვანელობით ჩადიოდა. 
