აქტუალური
თავდაცვის სამინისტრო FACEBOOK-დან არასასურველ კომენტარებს შლის
საქართველო, 23 დეკემბერი, საქინფორმი. საზოგადოებაში უკმაყოფილება გამოიწვია თავდაცვის სამინისტროს განცხადებამ, რომელიც უწყებამ უკრაინაში ქართველი ჯარისკაცის გარდაცვალებასთან დაკავშირებით გააკეთა.
სოციალურ ქსელ facebook-ზე გაისმა მოწოდებები, რომ თავდაცვის მინისტრი მინდია ჯანელიძე უნდა გადადგეს, თუმცა სამინისტროს ფეისბუკიდან კომენტარებს შლიან, ხოლო კომენტარის ავტორებს ბლოკავენ.
შეგახსენებთ, რომ უკრაინაში ქართველი ჯარისკაცის ალექსანდრე გრიგოლაშვილის დაღუპვასთან დაკავშირებით თავდაცვის სამინისტრომ შემდეგი შინაარსის განცხადება გააკეთა: „თავდაცვის სამინისტრო ღრმა მწუხარებას გამოთქვამს უკრაინაში საქართველოს მოქალაქე ალექსანდრე გრიგოლაშვილის დაღუპვის გამო და უსამძიმრებს მის ოჯახს. გვინდა ხაზგასმით აღვნიშნოთ, რომ ალექსანდრე გრიგოლაშვილის დაღუპვის გამო, სრული პასუხისმგებლობა ეკისრებათ ყოფილი ხელისუფლების წარმომადგენლებს, რომლებიც საქართველოს მოქალაქეებს მოუწოდებენ, მონაწილეობა მიიღონ ჩვენი ქვეყნის ფარგლებს გარეთ მიმდინარე საბრძოლო მოქმედებებში. თავდაცვის სამინისტროს მხრიდან არაერთხელ აღინიშნა, რომ მსგავსი მოწოდებები არის უპასუხისმგებლო და ემსახურება საქართველოს შეიარაღებული ძალების ყოფილი და მოქმედი სამხედრო მოსამსახურეების შეცდომაში შეყვანას. თავდაცვის სამინისტრო მოუწოდებს საქართველოს ყველა მოქალაქეს, არ აყვეს პროვოკაციას და სხვადასხვა შემოთავაზების სანაცვლოდ არ ჩაიგდოს საკუთარი სიცოცხლე საფრთხეში”,- ნათქვამია უწყების მიერ გავრცელებულ განცხადებაში”.
