საქართველო, 19 დეკემბერი, საქინფორმი. არასამთავრობო ორგანიზაცია „ადამიანი, კანონი, თავისუფლება“ სასჯელაღსრულების დაწესებულებებში ტუბერკულოზით დაავადებულთა, გარდაცვლილ პატიმართა, სუიციდის ფაქტების, დისციპლინარული დარღვევების გამო განთავისუფლებულ თანამშრომელთა რაოდენობის შესახებ 2011-14 წლის ჩათვლით არსებულ სტატისტიკურ მონაცემებს ასაჯაროვებს.

“თუ 2011 წელს გარდაცვლილ პატიმართა საერთო რაოდენობა 140 შეადგენდა, 2014 წლის მაჩვენებლით, ეს ციფრი 120-ით, 20 ერთეულამდე შემცირდა. რაც შეეხება 2012 წელს, რაოდენობამ 67-მდე, ხოლო 2013 წელს - 25-მდე დაიკლო“, - აცხადებს ორგანიზაციის აღმასრულებელი დირექტორი ნიკოლოზ მაღალდაძე.

მაღალდაძის განცხადებით, „ორგანიზაცია სასჯელაღსრულების დაწესებულებებში ფსიქო-სოციალურ პროგრამას ახორციელებს. სტატისტიკურ მონაცემებსა და მსჯავრდებულთა შეფასებაზე დაყრდნობით შესაძლოა მივიდეთ იმ დასკვნამდე, რომ სუიციდის ფაქტის მიზეზს მსჯავრდებულის წამიერი, განსაკუთრებული ფსიქოლოგიურ-ფსიქიკური მდგომარეობა წარმოადგენს და ეს არ არის დაკავშირებული დაწესებულებებში არსებულ ვითარებასთან“.