''საქართველოს ერთიანი სოციალ-ეკონომიკური კავშირი'' 2003 წლის 5 ივნისს დაფუძნდა. ის 3000-ზე მეტ წევრს აერთიანებს და სხვადასხვა საერთაშორისო ორგანიზაციის წევრია. კავშირის ფილიალები საქართველოს მრავალ რეგიონში გაიხსნა და იგი გამწვანების პროექტებში აქტიურად მონაწილეობს. კავშირის ადმინისტრაციას წარმოადგენენ: ელენე ფხაკაძე, იაგო შიოლაშვილი, გიორგი თათარაშვილი, ალექსანდრე ვასჩენკო, ქეთევან ბოჭოიძე, რაშიდ ჰასანოვი და გიორგი მამნიაშვილი. ''საქართველოს სოციალ-ეკოლოგიური კავშირი'' საქართველოს დედაქალაქის – თბილისის გამწვანების ახალი პროექტის განხორციელებას აპირებს. კავშირის ერთ-ერთ ღონისძიებაზე დასწრებისას საინფორმაციო ანალიტიკური სააგენტო საქინფორმის კორესპონდენტს კავშირის მესვეურებმა განუცხადეს, რომ პროექტი თბილისის შემოგარენში ფოთლოვანი ხეების დარგვასა და განადგურებული ტყის მასივების აღდგენას ითვალისწინებს. ასევე დაირგვება საქართველოში უწინ ფართოდ გავრცელებული მუხისა და წიფლის ხეები, შედარებით მცირე ოდენობით კი - წიწვოვანი მცენარეებიც; დარგავენ მუხის ტყის ქვედა იარუსისთვის დამახასიათებელ მცენარეებსაც: კუნელს, კვრინჩხს, ასკილს, მუშმულას და სხვ. დაირგვება ბალახოვანი მცენარეებიც. მათი შერჩევისას უპირატესობა მიენიჭება ენდემურსა და გადაშენების პირას ასრებულ ჯიშებს.
ტერიტორიის შერჩევისა და ტყის დაგეგმვისას სპეციალისტთა რეკომენდაციებს გაითვალისწინებენ. ნერგების დარგვის ღონისძიებები აქციის ორგანიზატორთა და სპეციალისტთა მეთვალყურეობით მოხდება, რომლებიც მთელი წლის განმავლობაში გააკონტროლებენ ნერგების მდგომარეობას, დაახლოებით ამდენი დრო სჭირდება იმას, რომ ფესვებმა ადგილობრივ საგრუნტე წყლებში ჩააღწიოს, ამიტომ ამ პერიოდში ნერგები განსაკუთრებულ მოვლას მოითხოვს.
გამწვანების აქციაში მონაწილეობისთვის 500 მოხალისე შეირჩევა. პროექტის ძირითადი მიზანია, ნაწილობრივ მაინც აღადგინოს თბილისში ოდესღაც არსებული მწვანე მასივები. ტყის მდგომარეობაზე პასუხისმგებლობას აქციის ორგანიზატორები საკუთარ თავზე იღებენ. როგორც საქინფორმს ''სოციო-ეკოლოგიური კავშირიდან'' აცნობეს, პროექტს ნაწილობრივ კავშირის სპონსორი ორგანიზაციები დააფინანსებენ, ნაწილობრივ კი - თბილისის ბიუჯეტი. შესაბამისი გეგმა დედაქალაქის მერიაში უკვე წარდგენილია. თუ საჭირო თანხა 2011 წლის ბიუჯეტიდან გამოიყოფა, პროექტის განხორციელება გაისად დაიწყება.