საქართველო, 13 ოქტომბერი, საქინფორმი. ავტობანის ახალი მონაკვეთი ოფიციალურად საქართველოს რეგიონული განვითარებისა და ინფრასტრუქტურის მინისტრმა დავით შავლიაშვილმა, საქართველოს საავტომობილო გზების დეპარტამენტის თავმჯდომარე ვაჟა ფანჩულიძემ, მსოფლიო ბანკის რეგიონულმა დირექტორმა და ჩინეთის სახალხო რესპუბლიკის სრულუფლებიანმა ელჩმა საქართველოში იუე ბინმა გახსნეს. ღონისძიებას, ასევე, ესწრებოდნენ რუისი–აგარას მონაკვეთის მშენებელი კომპანიის „ჩაინა ნუქლიარ ინდასთრის“ დირექტორი ჰან ნაიშანი და შიდა ქართლის გუბერნატორი ზურაბ რუსიშვილი.

პროექტის ღირებულება, რომლის მშენებლობასაც მსოფლიო ბანკი აფინანსებს,  70 მილიონი ლარია. სამუშაოებზე 500-ზე მეტი ადამიანია დასაქმებული, მათგან 70% ადგილობრივი მცხოვრებია. პროექტი ითვალისწინებს აღნიშნულ გზაზე ორდონიანი გადაკვეთების მოწყობას, სადაც 5 გზაგამტარი და 3 სახიდე გადასასვლელი აშენდება.

რუისი-აგარას მონაკვეთის მშენებლობის შედეგად, გაუმჯობესდება  საგზაო ქსელი, გაიზრდება ავტოტრანსპორტის ნაკადის გამტარუნარიანობა და მოძრაობის უსაფრთხოების დონე.