საქართველო, 9 ოქტომბერი, საქინფორმი. თურქეთის ხელისუფლებამ კომენდანტის საათი შემოიღო მას შემდეგ, რაც ქურთების მასობრივი საპროტესტო აქციების მიმდინარეობისას 14 კაცი დაიღუპა, რამდენიმე ათეული კი დაიჭრა, - იტყობინება „ასოშიეიტედ პრესი“.
კომენდანტის საათი გამოცხადდა დიარბაკირის, მარდინის, სიირტის, მუშის, ვანის, ბატმას პროვინციებში.

„მანიფესტანტებმა უნდა დატოვონ ქუჩები ანდა სიტუაციას შესაძლოა გაუთვალისწინებელი შედეგები მოჰყვეს. ძალადობა უპასუხოდ არ დარჩება“, - ახდენს „სინხუა“ თურქეთის შს მინისტრი ეფკან ალის ციტირებას.

შეტაკებებისას, რომლებიც 6 ოქტომბერს მთელ ქვეყანაში დაიწყო, დემონსტრანტები არბევდნენ მაღაზიებს, ხოლო პოლიციას, შენობებს და ავტომანქანებს ქვებსა და ცეცხლგამჩენი სითხით სავსე ბოთლებს უშენდნენ. პასუხად სამართალდამცავი ორგანოების თანამშრომლები წყლის ჭავლებსა და ცრემლსადენ გაზს იყენებდნენ.

7 ოქტომბერს საპროტესტო აქციის მონაწილე 100-მდე ქურთი ბრიუსელში, ევროპარლამენტის შენობაში შეიჭრა ევროკავშირის ქვეყნებისგან „ისლამური სახელმწიფოს“ ბოევიკების წინააღმდეგ ბრძოლაში აქტიური ჩართვის მოთხოვნით. 6 ოქტომბერს ქურთმა აქტივისტებმა საპროტესტო აქცია მოაწყვეს ჰააგაში, ნიდერლანდების პარლამენტში. ათობით აქტივისტი შენობაში შეიჭრა პლაკატებით „შეწყვიტეთ უმოქმედობა, მხარი დაუჭირეთ კობანს“.