საქართველო, 23 სექტემბერი, საქინფორმი. გუშინ, 22 სექტემბერს პრემიერი ირაკლი ღარიბაშვილი სიტყვით გამოვიდა გენერალური ასამბლეის სპეციალურ სესიაზე - „მოსახლეობისა და განვითარების შესახებ საერთაშორისო კონფერენციის სამოქმედო პროგრამის შესრულების საკითხებზე’’. ასევე, დაესწრო თურქეთის პრეზიდენტის სახელით გამართულ მიღებას.

ირაკლი ღარიბაშვილი პირისპირ შეხვდა ლატვიის პრეზიდენტ ანდრის ბერჟინსს, ლიტვის პრეზიდენტ დალია გრიბაუსკაიტეს და თურქეთის პრეზიდენტ რეჯებ ტაიიპ ერდოღანს. ასევე სიტყვით გამოვიდა კლიმატის სამიტზე, დაესწრო კლინტონის გლობალური ინიციატივის პლენარულ სესიას - Cities as Labs  of Innovation/ Remarks by President Obama “Stand with Civil Society Agenda” და MoMa-ს მუზეუმში ქართული ფილმების პირველი რეტროსპექტიული ჩვენებაც გახსნა. საქართველოს პრემიერ-მინისტრი მეუღლესთან ერთად მიიწვიეს აშშ-ს პრეზიდენტ ბარაკ ობამასა და მიშელ ობამას მიღებაზე, რომელიც გაეროს გენერალური ასამბლეის 69-ე სესიის მონაწილე დელეგაციების მეთაურებისა და მათი მეუღლეების პატივსაცემად იმართება.

24 სექტემბერს ირაკლი ღარიბაშვილი გენერალური ასამბლეის 69-ე სესიის გახსნასთან  დაკავშირებით გენერალური მდივნის მიერ გამართულ მიღებას და სესიის გენერალური დებატების გახსნას დაესწრება. დაგეგმილია პრემიერ-მინისტრის სიტყვით გამოსვლა საერთაშორისო ეკონომიკური ალიანსის (IEA) მიერ ორგანიზებული მეშვიდე ყოველწლიურ გლობალურ საინვესტიციო სიმპოზიუმზე -,,Invest in Georgia’’ და კონფერენციაზე - „ღია მმართველობის პარტნიორობა“.

დღის ბოლოს ირაკლი ღარიბაშვილი მიწვეულია ევროპის საბჭოსა და ევროკომისიის სახელით და არაბთა გაერთიანებული საემიროების საგარეო საქმეთა მინისტრის, შეიხ აბდულა ბინ ზაედ ალ ნაჰიანის მიერ გაეროს გენერალური მდივნის პატივსაცემად გამართულ მიღებებზე.

25 სექტემბერს საქართველოს მთავრობის მეთაური ნიუ-იორკში გვირგვინით შეამკობს 11 სექტემბრის ტერაქტისას დაღუპულთა მემორიალს.