საზოგადოება
ნიკა კვეზერელი: „საერთოდ არ ვიცნობ ხომერიკს“
საქართველო, 12 სექტემბერი, საქინფორმი. ყოფილი დეპუტატი და წარსულში ნასამართლევი ნიკა კვეზერელი სასტუმრო „ქორთიარდ მარიოტში“ „რუსი და ქართველი ხალხის ერთიანობის ფონდის“ პრეზიდენტ ვლადიმერ ხომერიკთან შეხვედრას უარყოფს. კვეზერელის განცხადებით, იგი სასტუმროში თავის მეგობარ ბეჟან ხურციძეს შეხვდა.
„მე შევხვდი მეგობარს. მასთან ერთად იყო ის, არ ვიცი ხომერიკია თუ რა გვარია. მე ჯერ მეგობარს შევხვდი და მერე მოგვიანებით ეგენი შემოუერთდნენ, მერე მე წამოვედი, საერთოდ არ ვიცნობ ხომერიკს. სანამ მე იქ ვიყავი პოლიტიკაზე არ ყოფილა საუბარი. შეხვედრა მისი მოსვლის შემდეგ დაახლოებით ათი წუთში დავტოვე,"- განაცხადა ნიკა კვეზერელმა.
შეგახსენებთ, რომ კვეზერელისა და ვლადიმერ ხომერიკის შეხვედრის ამსახველი ფოტო მასალა სოციალურ ქსელში გავრცელდა. ხომერიკი კი რუსეთში მცხოვრებ იმ ქართველთა რიცხვს მიეკუთვნება, რომლებიც სააკაშვილის ხელისუფლების წინააღმდეგ ღიად გამოდიოდნენ და არაერთხელ განუცხადებია, რომ საქართველოში პოლიტიკური ინტერესები აქვს.
