საქართველო, 2 სექტემბერი, საქინფორმი. გუშინ, 1 სექტემბერს, საქართველოს პრეზიდენტმა გიორგი მარგველაშვილმა საერთაშორისო ლიდერთა ფორუმი გახსნა და შეკრებილ საზოგადოებას სიტყვით მიმართა.
„ჩვენ ვართ ქვეყანა, რომელიც ცდილობს ააშენოს თანამედროვე დემოკრატიული სახელმწიფო. არსებობს ჩვენი მსგავსი კიდევ ერთი ქვეყანა - უკრაინა, სადაც ახლა ომია. ჩვენც, სწორედ მათ მსგავსად, თავისუფალი არჩევანისათვის დავისაჯეთ“, - განაცხადა  მარგველაშვილმა.

ქვეყნის პირველმა პირმა ყურადღება ახალ დემოკრატიულ სახელმწიფოთა წინაშე მდგარ გამოწვევებზეც გაამახვილა:

„რეალურად არსებობს გამოწვევა ახალი დემოკრატიული სახელმწიფოს მიმართ, რაც გულისხმობს დემოკრატიული მმართველობის ჩამოყალიბებას, დემოკრატიული ერის შექმნას, რომელსაც აქვს დასავლური ფასეულობები და დასავლური ორიენტაცია. ეს დაკავშირებულია ბევრ პრობლემასთან, გეოპოლიტიკურ გარემოსთან" , - აღნიშნა პრეზიდენტმა.

საერთაშორისო ლიდერთა ფორუმი თბილისში გუშინ გაიხსნა და 3 სექტემბერს დასრულდება.