საქართველო, 15 ივნისი, საქინფორმი. 12:00 საათის მონაცემებით, არჩევნებში მონაწილეობა მიიღო 571 123-მა ამომრჩეველმა, რაც  ამომრჩეველთა საერთო რაოდენობის  16,65%-ია. ამის შესახებ ცესკოს პრესსპიკერმა ეკა აზარაშვილმა საინფორმაციო ცენტრში გამართულ ბრიფინგზე განაცხადა.
შეგახსენებთ,  რომ 2013 წლის  საპრეზიდენტო არჩევნებზე  ამომრჩეველთა აქტივობამ  12:00 საათზე 17,15% შეადგინა.
ცენტრალურმა საარჩევნო კომისიამ  ამომრჩეველთა სიასთან დაკავშირებით განმარტებები გააკეთა.

როგორც ეკა აზარაშვილმა ბრიფინგზე განაცხადა, 1 მაისის  მონაცემებთან შედარებით, ამომრჩეველთა სია  43 024-ით შემცირდა. მისივე თქმით, მოქალაქეები, რომლებსაც არ გააჩნდათ იურიდიული ძალის მქონე პირადობის მოწმობა ან პასპორტი,  ვერ მიიღებდნენ  კენჭისყრაში მონაწილეობას, თუ დროულად  არ აიღებდნენ პირადობის დამადასტურებელ ერთ-ერთ დოკუმენტს მაინც. შესაბამისად, იმ მოქალაქეების მონაცემები, რომლებმაც აღნიშნული პროცედურა ვერ გაიარეს,  იუსტიციის სამინისტროსგან ცესკოს არ გადასცემია.