საქართველო, 11 ივნისი, საქინფორმი. სამხრეთ ოსეთში არჩევნებში გამარჯვება “ერთიანმა ოსეთმა” მოიპოვა, რომელსაც რესპუბლიკის საგანგებო სიტუაციების მინისტრი ანატოლი ბიბილოვი ხელმძღვანელობს - მას ხმა ამომრჩეველთა 43.1%-მა მისცა. პარლამენტში ისინი 34-დან 20 ადგილს დაიკავებენ. სულ პარლამენტში 4 პარტია იქნება წარმოდგენილი: “ერთიანი ოსეთი”, “ხალხის ერთობა” (13.21%, 6 ადგილი), სახალხო პარტია (9.08%, 4 ადგილი) და “ნიხასი” (7.47%, 4 ადგილი).
დანარჩენმა 5-მა პარტიამ, რომლებიც არჩევნებში მონაწილეობდნენ, 7-პროცენტიანი ბარიერის გადალახვა ვერ შეძლო. უკვე დათვლილია საუბნო საარჩევნო კომისიების ბიულეტენეის 100%. სულ ამომრჩეველთა გამოცხადებამ 64.14% შეადგინა.
“ერთიანი ოსეთის” პროგრამაში ნათქვამია, რომ პარტია აპირებს, “ოსეთის სამხრეთისა და ჩრდილოეთის მრავალეროვანი რუსეთის სახელმწიფოს შემადგენლობაში გაერთიანებას მიაღწიოს”. ამასთან, მას პროგრამა მინიმუმი და პროგრამა მაქსიმუმი აქვს.პროგრამა მინიმუმი გულისხმობს ფორმულას “ორი ქვეყანა - ერთი ოსეთი”, რომელიც ნიშნავს “სამხრეთ ოსეთის და ჩრდილოეთ ოსეთი ალანიას მაქსიმალურ ინტეგრაციას ორი სახელმწიფოს - რუსეთის და სამხრეთ ოსეთის რესპუბლიკის ფორმატში”.
პროგრამა მაქსიმუმი გახლავთ სამხრეთ და ჩრდილოეთ ოსეთის გაერთიანება რუსეთის შემადგენლობაში, რისთვისაც “ერთიანმა ოსეთმა” უკვე შეიმუშავა საგზაო რუკა - 5 თანმიმდევრული ნაბიჯი რუსეთში შესასვლელად.
პირველი 2 ნაბიჯი მოიცავს რუსეთის ფედერაციის შემადგენლობაში შესვლის საკითხზე რეფერენდუმის ინიცირებას და ჩატარებას. შემდეგ იგეგმება სამხრეთ ოსეთის პარლამენტის მიმართვის მომზადება რფ-ის პრეზიდენტის, მთავრობის და ფედერაციის საბჭოსადმი, რუსეთის შემადგენლობაში რესპუბლიკის შესვლის საკითხის განხილვის თხოვნით. შემდეგ პარტიას სურს შექმნას გარდამავალი პერიოდის მთავრობათაშორისი სამუშაო ჯგუფი, ხოლო დასასრულ - მიიღოს ქვეყნის ახალი კონსტიტუცია და რფ-ის კანონმდებლობაზე გადავიდეს.