საქართველო, 5 ივნისი, საქინფორმი. ნატოს შტაბბინაში თავდაცვის მინისტრების დონეზე ნატო-საქართველოს კომისიის სხდომა გაიმართა. ნატოს წევრი ქვეყნების თავდაცვის მინისტრებთან 28+1 ფორმატის შეხვედრა ნატოს გენერალურმა მდივანმა ანდერს ფოგ რასმუსენმა გახსნა.

„უსაფრთხოების სერიოზული გამოწვევების ფონზე ჩვენ ვაგრძელებთ მაღალი დონის დიალოგს საქართველოსთან. უკრაინის წინააღმდეგ რუსეთის აგრესიის გამო შექმნილი კრიზისი გავლენას ახდენს როგორც საქართველოზე, ასევე მის რეგიონსა და ევროატლანტიკურ უსაფრთხოებაზე. ნატო არ აღიარებს რუსეთის მიერ ყირიმის არალეგალურ ანექსიას. ასევე, არ ვცნობთ რუსეთის მიერ სამხრეთ ოსეთისა და აფხაზეთის აღიარებას. ნატო იზიარებს ყველა ერის უფლებას, გააკეთოს საგარეო და უსაფრთხოების პოლიტიკის სუვერენული არჩევანი. დღეს კვლავ ვაგრძელებთ აქტიურ დიალოგს საქართველოსთან. საქართველომ ძალიან კარგ პროგრესს მიაღწია, განსაკუთრებით თავდაცვისა და უსაფრთხოების სექტორში გამჭვირვალობისა და ანგარიშვალდებულების გაზრდის მიმართულებით. მოუთმენლად ველით რეფორმირების პროცესის გაგრძელებას და ჩვენც გავაგრძელებთ დახმარებას ამ კუთხით. კიდევ ერთხელ ვიმეორებ, რომ ბუქარესტის 2008 წლის სამიტზე მიღებული გადაწყვეტილება ძალაში რჩება. საქართველო გახდება ნატოს წევრი მას შემდეგ, რაც გაწევრიანებისთვის საჭირო ყველა მოთხოვნას დააკმაყოფილებს. ალიანსის საგარეო საქმეთა მინისტრები საქართველოს მისწრაფებას - გახდეს ნატოს წევრი, თვის ბოლოს განიხილავენ. დარწმუნებული ვარ, რომ საქართველოს მიერ მიღწეული პროგრესი სათანადოდ აისახება მომავალ სამიტზე“.

სხდომაზე სიტყვით გამოვიდა საქართველოს თავდაცვის მინისტრი ირაკლი ალასანია.