საქართველო, 30 მაისი, საქინფორმი. უკრაინა რუსეთის გაზს მისი მაღალი საფასურის გამო არ შეისყიდის. როგორც ქვეყნის საპრეზიდენტო არჩევნებში გამარჯვებულმა ოლიგარქმა პეტრე პოროშენკომ განაცხადა, ამის ნაცვლად კიევს ევროპიდან და აშშ-დან გაზის რევერსული მიწოდების იმედი აქვს.

პოროშენკო დარწმუნებულია, რომ უკრაინა ენერგეტიკის პრობლემას 2017 წლამდე საბოლოოდ გადაჭრის. პრეზიდენტი ამბობს, რომ უკრაინა გაზში გაზრდილ ფასს არ გადაიხდის და რუსეთს შეუძლია ახალი მყიდველების ძებნა დაიწყოს. მან ასევე აღნიშნა, რომ ჩინეთი რუსეთისგან გაზს 1000 კუბურ მეტრზე 300 ამერიკულ დოლარად მიიღებს, მაშინ როდესაც უკრაინას დაახლოებით 500 დოლარის გადახდა უწევს, ამიტომ უკრაინა რუსეთისგან გაზს აღარ შეიძენს.

"ჩვენ გვაქვს გეგმა. პირველ რიგში, დავიწყებთ გაზის რევერსირებას. მეორე რიგში, შევამცირებთ მოხმარებას. მესამე - განვავითარებთ ფიქლის გაზის ტექნოლოგიას და ავაშენებთ თხევადი გაზის ტერმინალებს. ამასთან დაკავშირებით უკვე გვაქვს მოლაპარაკება ამერიკელ პარტნიორებთან, რომლებიც უკრაინას თხევადი გაზით მოამარაგებენ", - ამბობს პოროშენკო.

გაზის რევერსირებას, ანუ რუსული გაზის სხვა ევროპული ქვეყნებიდან შემოტანას უკრაინა უკვე ნოემბრიდან დაიწყებს. გარდა ამისა, პოროშენკოს თქმით, შემოდგომისა და ზამთრის დასახვედრად უკრაინა მზად არის, რადგან მათ ბუნებრივი აირის რეკორდული რეზერვები აქვთ. რევერსული გაზი უკრაინას უფრო იაფი დაუჯდება, ვიდრე პირდაპირ რუსეთისგან ყიდვა.

რუსულ გაზს უკრაინას, სავარაუდოდ, მიაწვდის სლოვაკეთი 2014 წლის ნოემბრიდან. ასევე, გერმანია პოლონეთის გავლით.

“დროა, რუსეთმა შეწყვიტოს გაზის ბერკეტად გამოყენება. შანტაჟის დრო დამთავრდა”, - აცხადებს პოროშენკო.