საქართველო, 29 მაისი, საქინფორმი. წუხელ გარდაბნის რაიონში ქართველ და აზერბაიჯანელ ახალგაზრდებს შორის კონფლიქტი მოხდა. დაპირისპირება გარდაბნის ერთ-ერთ ჩაის სახლში სიტყვიერი შეურაცხყოფით დაიწყო, მოგვიანებით კი მხარეები ერთმანეთს ხელკეტებითა და ქვებით გაუსწორდნენ. კონფლიქტში 200-მდე ადამიანი მონაწილეობდა. მოსახლეობის ნაწილს მიაჩნია, რომ ერთმანეთს კოალიცია „ქართული ოცნებისა“ და  „ერთიანი ნაციონალური მოძრაობის” მხარდამჭერები დაუპირისპირდნენ, ნაწილი კი მიიჩნევს, რომ კონფლიქტი ეთნიკურ ნიადაგზე მოხდა. ვითარების განმუხტვა საქმეში პოლიციისა და სპეცრაზმის ჩარევის შემდეგ მოხერხდა. რამდენიმე ახალგაზრდა მსუბუქად არის დაშავებული.

“ერთიანი ნაციონალური მოძრაობა” წუხელ, 29 მაისს გარდაბანში მომხდარი მასშტაბური ფიზიკური დაპირისპირების გამოძიებას მოითხოვს. ამის შესახებ გუშინ გამართულ პრესკონფერენციაზე პარტიის ერთ-ერთმა ლიდერმა გიგი უგულავამ განაცხადა, რომლის თქმითაც, “ნაციონალური მოძრაობის” მხარდამჭერ ახალგაზრდებს "ქართული ოცნების" წარმომადგენლები ფიზიკურად პოლიტიკური ნიშნით დაუპირისპირდნენ.

„ეს თავდასხმა აშკარად ატარებდა პოლიტიკურ ხასიათს... გუშინ ჩვენ უხვად ვიხილეთ პოლიტიკურთან ერთად ეთნიკური შეურაცხმყოფელი ტერმინებიც. ჩვენ კატეგორიულად მოვითხოვთ, რომ ეს საქმე უსწრაფესად იქნეს გამოძიებული", - განაცხადა უგულავამ.