საზოგადოება
ბრიჯიტ ბრინკი: „ჭიაბერაშვილზე თავდასხმამ შესაძლოა ლაქა მოსცხოს საქართველოს რეპუტაციას უცხოეთში“
საქართველო, 28 მაისი, საქინფორმი. ზურაბ ჭიაბერაშვილზე თავდასხმამ შესაძლოა ლაქა მოსცხოს საქართველოს რეპუტაციას უცხოეთში, - ამის შესახებ საქართველოში აშშ-ის ელჩის მოადგილე ბრიჯიტ ბრინკმა "ნაციონალური მოძრაობის" წევრ ზურაბ ჭიაბერაშვილზე თავდასხმის კომენტირებისას განაცხადა.
„დაგეგმილი არჩევნების კონტექსტში ეს შეიძლება პოლიტიკური პროცესისთვის ძირგამომთხრელი იყოს და ლაქა მოსცხოს საქართველოს რეპუტაციას უცხოეთში. ველით და მტკიცედ ვუჭერთ მხარს მოწოდებებს გამოძიების ჩატარების თაობაზე, რაც, იმედია, სწრაფად მოხდება", - განაცხადა ბრიჯიტ ბრინკმა.
შეგახსენებთ, რომ ზურაბ ჭიაბერაშვილზე თავდასხმა აბაშიძის ქუჩაზე მდებარე ლიტერატურულ კაფეში გუშინ მოხდა. ჭიაბერაშვილი კაფეში ნოდარ ლადარიასთან ერთად იმყოფებოდა. მათ თავს დაესხნენ რეჟისორი გიორგი მგელაძე და რეზო თაბუკაშვილი. ჭიაბერაშვილს დაზიანებები თავის და სახის არეში აქვს მიყენებული. მგელაძე და თაბუკაშვილი პოლიციიდან ხელწერილის საფუძველზე გათავისუფლდნენ.
