საქართველო, 27 მაისი, საქინფორმი. უკრაინაში „ფერადი რევოლუციის“ მოწყობის მცდელობა შეინიშნება. ამის შესახებ საერთაშორისო უსაფრთხოებასთან დაკავშირებით მოსკოვის მე-3 კონფერენციაზე რფ-ის თავდაცვის მინისტრმა, არმიის გენერალმა სერგეი შოიგუმ განაცხადა.

მისი თქმით, უწინ ამ სცენარის რეალიზების მცდელობები „დსთ-ის სხვა ქვეყნების ტერიტორიებზე შეინიშნებოდა“. „უახლოეს წარსულში ესენი იყვნენ ცენტრალური აზიის ქვეყნები და საქართველო. ახლა კი ჯერი უკრაინაზეა“, - აღნიშნა მან.

„გარე ძალების აქტიური მონაწილეობით ხელისუფლებიდან მოქმედი პრეზიდენტის იძულებითი ჩამოშორების შემდეგ ქვეყანა, პრაქტიკულად, სამოქალაქო ომამდე მივიდა. დაძაბულობის ახალი კერის შექმნა ნეგატიურად აისახა საყოველთაო უსაფრთხოებაზე“, - აღნიშნა მინისტრმა, რომლის განცხადებითაც, „ფერადი რევოლუციის“ რეალიზაციის სქემა უნივერსალურია: „სამხედრო ზეწოლა, პოლიტიკური ხელმძღვანელობის შეცვლა, სახელმწიფოს საგარეო-პოლიტიკური და ეკონომიკური ვექტორების ცვლილება“.

მან ასევე აღნიშნა, რომ „ფერად რევოლუციებს“ მუდამ თან სდევს საინფორმაციო ომი და სპეცდანიშნულების ძალების გამოყენება, რაც შეიარაღებული ბრძოლის ფორმებს იღებს.