საქართველო, 23 მაისი, საქინფორმი. საგარეო საქმეთა მინისტრი მაია ფანჯიკიძე გამოეხმაურა რუსეთის საგარეო საქმეთა სამინისტროს ოფიციალური წარმომადგენლის ალექსანდრ ლუკაშევიჩის განცხადებას, რომლითაც მოსკოვი ოფიციალურ თბილისს 27 ივნისს ევროკავშირთან ასოცირების ხელშეკრულების გაფორმებამდე საფრთხეების კარგად გაანალიზებისკენ მოუწოდებს.

„საქართველოს მიერ ევროკავშირთან ასოცირების ხელშეკრულების გაფორმება არის ძალიან კარგი ჩვენი ქვეყნისთვის და წარმოუდგენელია, ეს იყოს ცუდი ვინმესთვის, მათ შორის – რუსეთისთვის. ჩვენ არავის წინააღმდეგ არ ვერთიანდებით და არავის წინააღმდეგ არ ვდებთ ამ ხელშეკრულებას“, – განაცხადა მაია ფანჯიკიძემ.

ლუკაშევიჩის განცხადებას გამოეხმაურა საქართველოს პრეზიდენტის მრჩეველი ვანო მაჭავარიანიც, რომლის თქმითაც, ქვეყანა ყველანაირი გამოწვევისთვის მზად უნდა იყოს. „ჩვენი პარტნიორები ყველაფერს გააკეთებენ საქართველოსთან ერთად, რომ ხელმოწერას ხელი არაფერმა შეუშალოს”, - განაცხადა პრეზიდენტის მრჩეველმა.