geflag
აქტუალური
31-ე ბატალიონის მეოთხე ნაკადი სამშობლოში დაბრუნდა

akt-1საქართველო, 8 მაისი, საქინფორმი. ქართველი მებრძოლები ავღანეთიდან სამშობლოში ბრუნდებიან. მესამე ქვეითი ბრიგადის 31-ე ბატალიონის 150 სამხედრო მოსამსახურეს დღეს საქართველოს შეიარაღებული ძალების გენერალური შტაბის უფროსის მოადგილე, პოლკოვნიკი გიორგი კბილცეცხლაშვილი, შეიარაღებული ძალების მთავარი სერჟანტი ალუდა კოპალიანი და სახმელეთო ძალების დასავლეთ ოპერატიული დაჯგუფების სარდალი, პოლკოვნიკი ბესიკ გოფოძე ალექსეევკის აეროდრომზე დახვდნენ. სამხედროებს საქართველოში დაბრუნება და ISAF-ის მისიის წარმატებით განხორციელება მიულოცეს, ასევე, მესამე ქვეითი ბრიგადის მეთაურმა ვიცე-პოლკოვნიკმა მალხაზ მერლანმა და და გენერალური შტაბის სხვა ხელმძღვანელმა პირებმა.

31-ე ბატალიონის სამხედროებმა ISAF-ის მისია აშშ-ის საზღვაო ქვეითების დაქვემდებარებაში ჰელმანდის პროვინციაში შეასრულეს. ბატალიონის მთავარი ამოცანა ოპერაციის რაიონში ამბოხებულთა ძალების გაუვნებლება, ადგილობრივი მთავრობისა და ეროვნული უსაფრთხოების ძალების განვითარების მხარდაჭერა და უსაფრთხოების ზონების კონტროლი იყო. მესამე ქვეითი ბრიგადის 31-ე ბატალიონის სამხედრო მოსამსახურეები ავღანეთში როტაციის წესით მეორე ქვეითი ბრიგადის 23-ე ბატალიონმა ჩაანაცვლა. რამდენიმე კვირაში 31-ე ბატალიონის სამხედროები სამშობლოში სრულად დაბრუნდებიან.