საქართველო, 2 მაისი, საქინფორმი. 30 აპრილს ვაშინგტონში, ატლანტიკური საბჭოს კონფერენციის ფარგლებში, საქართველოს თავდაცვის მინისტრმა შეხვედრა გამართა აშშ-ის ვიცე-პრეზიდენტ ჯოზეფ ბაიდენთან.

ირაკლი ალასანიამ აშშ-ის ვიცე-პრეზიდენტს მადლობა გადაუხადა ქვეყნის ტერიტორიული მთლიანობის, სუვერენიტეტისა და ნატოში გაწევრიანების აქტიური მხარდაჭერისათვის. ასევე, თავდაცვის მინისტრმა კიდევ ერთხელ გაუსვა ხაზი აშშ-საქართველოს სტრატეგიული პარტნიორობის მნიშვნელობას.

შეხვედრაზე განხილულ იქნა უკრაინაში მიმდინარე მოვლენები და რუსეთის პოლიტიკა რეგიონში. ირაკლი ალასანიამ ხაზი გაუსვა აშშ-სა და ევროპის ერთობლივი ძალისხმევის მნიშვნელობას რეგიონში სიტუაციის სტაბილიზაციისა და არსებული გამოწვევების გამკლავებისათვის. მნიშვნელოვანი ყურადღება დაეთმო საქართველოს ნატოში გაწევრიანების საკითხის განხილვას. ქართული მხრიდან კიდევ ერთხელ გაესვა ხაზი საქართველოსთვის MAP-ის მინიჭებისა და ამ კუთხით აშშ-ის აქტიური მხარდაჭერის აუცილებლობას.