"ჩვენი საქართველო - თავისუფალი დემოკრატების" ლიდერი ირაკლი ალასანია დღეს ვაშინგტონში, ჯორჯ ვაშინგტონის უნივერსიტეტში, სიტყვით გამოვა. დღესვე დაგეგმილია შეხვედრა "Freedom House"-ის აღმასრულებელ დირექტორ დავიდ კრამერთან და აშშ-ის ეროვნულ-დემოკრატიული ინსტიტუტის (NDI) ხელმძღვანელთან მირიამ ლანსკოისთან. ამასთან, ვიზიტის ფარგლებში ალასანია უკვე შეხვდა აშშ-ის ვიცე-პრეზიდენტის, ჯო ბაიდენის მრჩეველს ევროპისა და ევრაზიის საკითხებში. "თავისუფალი დემოკრატების" ლიდერის განცხადებით, შეხვედრებზე ერთ-ერთი პრიორიტეტული თემა, ასევე, იქნება რუსეთთან ურთიერთობების ნორმალიზება. ირაკლი ალსანია აშშ-ში შეხვდება აშშ-ის პრეზიდენტის - ბარაკ ობამას მრჩეველს ევროპისა და ევრაზიის საკითხებში - ელისაბედ შურვუდსა და რუსეთის საკითხებში - მაიკლ მაკფოლს. ირაკლი ალასანიას ვიზიტი აშშ-ში 15 ნოემბერს დაიწყო და 23 ნოემბრამდე გაგრძელდება.
რაც შეეხება ''წარმომადგენლობითი სახალხო კრების'' მიერ 25 ნოემბერს დაგეგმილ საპროტესტო აქციას, საქინფორმი დაინტერესდა - აპირებს თუ არა ალასანიას გუნდი 25 ნოემბერს პარლამენტის შენობის წინ დაგეგმილ აქციაზე გასვლას. როგორც პარტიის ერთ-ერთმა ლიდერმა და საკრებულოს წევრმა ვიქტორ დოლიძემ განგვიცხადა, ის და მისი თანაპარტიელები გაცილებით სერიოზული საქმეებით არიან დაკავებულნი და 25–ში არ აპირებენ რუსთაველის გამზირზე გასვლას. ჩვენს შეკითხვაზე, თუ რა არის უფრო სერიოზული საქმე, დოლიძემ განგვიცხადა, რომ ის თბილისის ბიუჯეტის საკითხებზე მუშაობს.