უცხოეთი
სომხეთის პარლამენტის სპიკერად დეპუტატი სააკიანი აირჩიეს

1saakyanსაქართველო, 30 აპრილი, საქინფორმი. სომხეთის ნაციონალური კრების (პარლამენტის) სპიკერად სომხეთის მმართველი რესპუბლიკური პარტიის თავმჯდომარის მოადგილე გალუსტ სააკიანი აირჩიეს.

სომხეთის ნაციონალური კრების სპიკერის თანამდებობა ვაკანტური მას შემდეგ გახდა, რაც 13 აპრილს ამ პოსტზე მყოფი ოვიკ აბრამიანი პრეზიდენტის ბრძანებით მთავრობის ხელმძღვანელად დაინიშნა. წინა პრემიერ მინისტრი ტიგრან სარქისიანი, რომელიც მთავრობას 2008 წლის აპრილიდან ხელმძღვანელობდა, 3 აპრილს გადადგა. ხოლო მეორე დღეს პრეზიდენტმა სერჟ სარქისიანმა მთავრობის გადადგომაც მიიღო.
სპიკერის პოსტზე ორი პრეტენდენტი იყო - მმართველმა პარტიამ წარადგინა 66 წლის სააკიანის კანდიდატურა, ხოლო სომხეთის ოპოზიციური ნაციონალური კონგრესიდან საკუთარი კანდიდატურა დეპუტატმა, სომხეთის ექს პრემიერმა, 56 წლის გრანტ ბაგრატიანმა თავად წამოაყენა.
კენჭისყრაში მონაწილეობა მიიღო 106-მა დეპუტატმა, რომელთაგან 101-მა ხმა სააკიანს მისცა.