საქართველო, 29 აპრილი, საქინფორმი. თაღლითური გზით ჯეკპოტის თანხის მიღების მცდელობა თუ ლატარიის კომპანიის ჩანაფიქრი, რომ  მოგებული ბილეთის პატრონს თანხა არ გადაუხადოს -  ამას ახლა სასამართლო არკვევს. გამოძიება ორ პირს ადანაშაულებს იმ  მონაცემების გაყალბებაში, რითაც მომგებიანი ბილეთის შექმნა მოხდა. ისინი კი ბრალს არ აღიარებენ და ლატარიის კომპანიას გამოძიების შეცდომაში შეყვანაში ადანაშაულებენ. სოფო ყარალაშვილი კომპანიისგან მოგებულ თანხას ითხოვს და არ გამორიცხავს,  რომ სასამართლოსაც მიმართოს (იხ. ვიდეო).

„მარკეტინგის სამსახურის უფროსი დამიკავშირდა, მომილოცა, მითხრა, რომ სამშაბათს არის დაჯილდოება. იმის მერე, როცა არ ვუკავშირდებოდი, სულ რაღაც გაუგებარ პასუხებს მცემდა. თანხის მოსათხოვად ჩემს ადვოკატთან ერთად მივედი, ორშაბათს მობრძანდითო, მაგრამ ორშაბათადე ვინ დამაცადა, წამიყვანეს მოდულის შენობაში და წამიყენეს ბრალი“, - აცხადებს ყარალაშვილი.

წარდგენილ ბრალს არც მეორე ბრალდებული დავით იაშვილი აღიარებს, რომლის ადვოკატიც ამბობს, რომ იაშვილის წინააღმდეგ მტკიცებულებები გამოძიებას არ აქვს. იგი ასევე განმარტავს, რომ მისი დაცვის ქვეშ მყოფი იაშვილი და ჟურნალისტი სოფო ყარალაშვილი ერთმანეთს არ იცნობდნენ. მისი განცხადებითვე, „ძალიან საეჭვოა თვითონ ამ კომპანიის დამოკიდებულება ამ საქმის მიმართ“.