პოლიტიკა
საქართველოს პრემიერ-მინისტრის ინიციატივით მეწარმეობა საშუალო განათლების სისტემაში სავალდებულო საგანი გახდება
საქართველო, 24 აპრილი, საქინფორმი. სტრატეგიული დოკუმენტი სახელწოდებით „შექმენი მომავალი“ მთავრობის მეთაურის დავალებით განათლებისა და მეცნიერების სამინისტრომ მოამზადა და ის ეკონომიკური საბჭოს სხდომაზე განიხილეს.
სტრატეგიის თანახმად, პროექტი თავდაპირველად საპილოტე იქნება და საქართველოს მასშტაბით 2014-2015 სასწავლო წლიდან 100 სკოლაში განხორციელდება.
პროექტის განხორციელებას ერთობლივად უზრუნველყოფენ განათლებისა და მეცნიერების, სპორტისა და ახალგაზრდობის საქმეთა სამინისტროები, ასევე საქართველოს სავაჭრო-სამრეწველო პალატა. მეწარმეობა სკოლებში დღემდე არჩევითი საგანი იყო, თუმცა, საგნის მნიშვნელობიდან გამომდინარე, იგი სავალდებულო გახდება და მოსწავლეები XI კლასში, კვირაში ორი საათის განმავლობაში ისწავლიან.
საქართველოს პრემიერ-მინისტრი მიიჩნევს, რომ სამეწარმეო განათლების შედეგად მოსწავლეები მეტ ცოდნას მიიღებენ და გამოუმუშავდებათ უნარები, რათა მომავალში თავად გახდნენ მეწარმეები და ადამიანები დაასაქმონ.
