საქართველო, 16 აპრილი, საქინფორმი. საქართველოს მთავრობას სპორტის განვითარების მიმართულებით გრძელვადიანი და სისტემური ხედვა აქვს, - ამის შესახებ საქართველოს პრემიერ-მინისტრმა ირაკლი ღარიბაშვილმა სპორტის განვითარებისადმი მიძღვნილ კონფერენციაზე სიტყვით გამოსვლისას განაცხადა.

„ჩვენმა მთავრობამ უკვე გადადგა ნაბიჯები სპორტის განვითარების კუთხით. მთავრობა მხოლოდ მოკლევადიანი, კონკრეტული გეგმებით კი არ შემოიფარგლება, არამედ გვაქვს გრძელვადიანი და სისტემური ხედვა ამ მიმართულებით. ახლახან დავამტკიცეთ ძალიან მნიშვნელოვანი დოკუმენტი, რომელიც სპორტის სახელმწიფო პოლიტიკას ეხება და განსაზღვრავს სპორტის განვითარების სტრატეგიულ მიმართულებებს. მთავრობა ინტენსიურად მუშაობს, რომ სპორტს ჰქონდეს მაქსიმალური ხელშეწყობა სახელმწიფოს მხრიდან და სახელმწიფო დაფინანსება ქართული სპორტის განვითარების საქმეში სოლიდური იყოს“, - განაცხადა პრემიერმა კონფერენციაზე და განმარტა, რომ ამ მიმართულებით მთავრობამ კონკრეტული ნაბიჯები უკვე გადადგა.

ირაკლი ღარიბაშვილის განცხადებით, სპორტის სახელმწიფო პოლიტიკა ხელს შეუწყობს რეგიონულ საფეხბურთო გუნდებს, ახალგაზრდულ ფეხბურთს, რაც დადებითად აისახება ქართული ფეხბურთის აღორძინებაზე.