საქართველო, 3 აპრილი, საქინფორმი. აშშ-მა კოსმოსურ სფეროში, საერთაშორისო კოსმოსური სადგურის პროექტის გარდა, რუსეთთან თანამშრომლობა შეწყვიტა, იტყობინება NASA.

„იმის გათვალისწინებით, რომ რუსეთი აგრძელებს უკრაინის სუვერენიტეტისა და ტერიტორიული მთლიანობის დარღვევას, NASA შეაჩერებს რუსეთის ფედერაციასთან კონტრაქტების დიდ ნაწილს. თუმცა, NASA და როსკოსმოსი განაგრძობენ ერთად მოქმედებას საერთაშორისო კოსმოსური სადგურის უწყვეტი მუშაობისა და უსაფრთხოების უზრუნველსაყოფად“, - ნათქვამია ოფიციალურ განცხადებაში.

NASA-ს განცხადებაში ასევე დასახულია მიზანი, რომ რაც შეიძლება მალე დაასრულონ საკუთარი პილოტირებული ხომალდის აღჭურვა და ამერიკელი ასტრონავტების საერთაშორისო კოსმოსურ სადგურზე გაგზავნისას გათავისუფლდნენ „რუსეთზე დამოკიდებულებისაგან“. შესაბამისი საბიუჯეტო დაფინანსების შემთხვევაში, ზოგიერთი ექსპერტის აზრით, ასეთი ხომალდი შესაძლოა 2017 წლისათვის აიგოს.