საქართველო, 12 მარტი, საქინფორმი. საზოგადოებრივი ინტერესიდან გამომდინარე, ბრალდებულ გიორგი უგულავას მიერ დღეს გავრცელებულ ინფორმაციასთან დაკავშირებით საზოგადოებას განვუმარტავთ, რომ 2014 წლის 07 მარტს საქართველოს მთავარმა პროკურატურამ დაასრულა გამოძიება გიორგი უგულავასა და სხვათა მიერ „თბილისის განვითარების ფონდის“ კუთვნილი  თანხების გაფლანგვის ბრალდების სისხლის სამართლის საქმეზე და არსებითი განხილვის მიზნით საქმე გაიგზავნა თბილისის საქალაქო სასამართლოში.

კანონის მოთხოვნათა შესაბამისად, პროკურატურამ დაცვის მხარეს სრულად გადასცა სისხლის სამართლის საქმის მასალები, მათ შორის თბილისის საქალაქო სასამართლოს მოსამართლის 2013 წლის 24 დეკემბრის ბრძანების საფუძველზე გატარებული ოპერატიულ-სამძებრო ღონისძიების „სატელეფონო საუბრის ფარული მიყურადებისა და ჩაწერის“ შედეგად მოპოვებული ბრალდებულ გიორგი უგულავას სატელეფონო საუბრების ჩანაწერები, რომლებიც მტკიცებულებითი მნიშვნელობისაა.