უცხოეთი
პუტინმა მიიღო იანუკოვიჩის თხოვნა უკრაინაში რფ-ის სამხედრო ძალის გამოყენებაზე
საქართველო, 4 მარტი, საქინფორმი. რუსეთის პრეზიდენტმა ვლადიმერ პუტინმა ვიქტორ იანუკოვიჩისგან მიიღო წერილობითი თხოვნა უკრაინის მოსახლეობის დასაცავად რუსეთის შეიარაღებული ძალების გამოყენების თაობაზე. ამის შესახებ გაეროს უშიშროების საბჭოში რუსეთის მუდმივმა წარმომადგენელმა ვიტალი ჩურკინმა განაცხადა.
„დღეს უფლებამოსილი ვარ შეგატყობინოთ შემდეგი: რუსეთის პრეზიდენტმა მიიღო უკრაინის პრეზიდენტ ვიქტორ იანუკოვიჩის მიმართვა. ციტირებას ვახდენ. უკრაინის პრეზიდენტის განცხადება. როგორც უკრაინის კანონიერად არჩეული პრეზიდენტი, ვაცხადებ: მაიდანზე განვითარებულ მოვლენებსა და ძალაუფლების ხელში ჩაგდებას კიევში შედეგად მოჰყვა ის, რომ უკრაინა სამოქალაქო ომის ზღურბლზე აღმოჩნდა. ქვეყანაში ქაოსი და ანარქია სუფევს. ხალხის სიცოცხლე და უსაფრთხოება, განსაკუთრებით სამხრეთ-აღმოსავლეთსა და ყირიმში, საფრთხის ქვეშაა. დასავლეთის ქვეყნების ზეგავლენით ხორციელდება აშკარა ტერორი და ძალადობა. ადამიანებს პოლიტიკური და ენობრივი ნიშნით დევნიან“, - განაცხადა ჩურკინმა.
„ამასთან დაკავშირებით მივმართავ რუსეთის პრეზიდენტ ვლადიმერ პუტინს თხოვნით, გამოიყენოს რუსეთის ფედერაციის შეიარაღებული ძალები კანონიერების, მშვიდობის, წესრიგის, სტაბილურობის აღსადგენად და უკრაინის მოსახლეობის დასაცავად. ვიქტორ იანუკოვიჩი, 1 მარტი, 2014 წელი“. - ნათქვამია იანუკოვიჩის მიმართვაში.
