საქართველო, 26 თებერვალი, საქინფორმი. ერთ-ერთი სტრატეგიული ობიექტის დასაცავად ტოლიატიდან (რუსეთი) ყირიმში რუსეთის ГРУ-ს სპეცდანიშნულების ცალკეული ბრიგადა მიავლინეს. ძალოვანები უკრაინაში ვითარების სრულ სტაბილიზაციამდე იმსახურებენ. 73online-ს მონაცემებით, უკვე დღესვე მათ შესაძლოა შეუერთდნენ კოლეგები ულიანოვსკიდან - ისინი მივლინებისთვის ემზადებიან და გამგზავრების ბრძანებას ელოდებიან.

ოფიციალური ინფორმაციით, მედესანტეები ვოლგისპირა ქალაქიდან ვითომდა ნახევარკუნძულზე წესრიგის შენარჩუნებაში დაეხმარებიან ქვეყანაში არსებული არასტაბილური, დაძაბული პოლიტიკური სიტუაციის გამო. ამ დროს კი, BlackSeanews-ის მონაცემებით, რფ-ის შავი ზღვის ფლოტის ესკადრამ, რომელიც სოჭიდან 25 თებერვალს დაბრუნდა, 11 ათასი შეიარაღებული მედესანტე სევასტოპოლში ჩაიყვანა. შეიარაღებული მებრძოლებით სავსე ორი სამხედრო ავტომობილი “ურალი” გუშინ იალტაშიც შენიშნეს.