საქართველო, 10 თებერვალი, საქინფორმი. 2014 წლის 10 თებერვლიდან ზუგდიდის, აბაშის, მარტვილის, ჩხოროწყუს, წალენჯიხის და ხობის მუნიციპალიტეტებსა და  ქალაქ ფოთში მოსახლეობის საყოველთაო აღწერის მოსამზადებელი სამუშაოები იწყება, რაც თითოეული დასახლების მიხედვით შენობებისა და მათში ფაქტიურად მცხოვრები ოჯახების სიების შედგენას ითვალისწინებს. ამისთვის საქსტატმა მოამზადა 350 რეგისტრატორი,  რომლებიც ზემოაღნიშნულ სამუშაოებს 14 დღის განმავლობაში ჩაატარებენ.

საქართველოს მოსახლეობის 2014 წლის საყოველთაო აღწერის ფარგლებში, აღწერის მოსამზადებელი სამუშაოები უკვე ჩატარდა აჭარის, გურიის, კახეთის რეგიონებსა და დედაქალაქში. ოჯახების სიების შედგენა 20 თებერვლიდან გაგრძელდება შიდა ქართლისა და მცხეთა-მთიანეთის, მარტში - სამცხე-ჯავახეთისა და ქვემო ქართლის რეგიონებში, ხოლო აპრილში პირველი ეტაპი იმერეთის რეგიონით დასრულდება. საყოველთაო აღწერის მოსამზადებელ სამუშაოებზე სულ 4 ათასი ადამიანი დასაქმდება.

მოსახლეობის საყოველთაო აღწერა მოსამზადებელი სამუშაოების დასრულების შემდეგ, 2014  წლის 5-19 ნოემბერს ჩატარდება.  ამ მიზნისთვის შეირჩევა 15 ათასი ადამიანი, რომლებიც მოსახლეობას სპეციალური კითხვარების მეშვეობით ინდივიდუალურად გამოკითხავენ.