საქართველო, 7 თებერვალი, საქინფორმი. დღეს, 7 თებერვალს მთავრობის სხდომა გაიმართა, სადაც დღის წესრიგით  41 საკითხი განიხილეს, დაემატა 1 საკითხი, დამტკიცდა 42 საკითხი.

მთავრობის სხდომის გადაწყვეტილებით, მკაცრდება საჯარიმო სანქციები სამედიცინო კლინიკების მიმართ, თუკი პაციენტთან შეთანხმების გარეშე მას გეგმურ მომსახურებაზე დაარეგისტრირებენ. საყოველთაო დაზღვევაში ჩართულ პაციენტებს უნდა ჰქონდეთ თავისუფალი არჩევანის შესაძლებლობა.

ამას გარდა, შრომის, ჯანმრთელობისა და სოციალური დაცვის სამინისტროს ინციატივით დამტკიცდა მიუსაფარ პირთა დროებითი თავშესაფრის ფუნქციონირების მინიმალური სტანდარტები, კვების ორგანიზების ნორმები, დროებითი თავშესაფრის შინაგანაწესი და პერსონალის ფუნქცია-მოვალეობები.

დღესვე მთავრობის წევრებმა მხარი დაუჭირეს საკითხს, რომლის მიხედვითაც, ასოცირების ხელშეკრულების ეფექტიანად განხორციელების მიზნით, შესაბამის სამინისტროებს დაევალათ ყოველწლიური სამოქმედო გეგმის, ანგარიშების მომზადება და შესრულების მონიტორინგი.