მიმდინარე წელს საქართველოში შიდსით ინფიცირების 366 შემთხვევა დაფიქსირდა.

როგორც საქინფორმს ინფექციური პათოლოგიის, შიდსისა და კლინიკური იმუნოლოგიის ცენტრიდან აცნობეს, გასული წლის შესაბამის პერიოდთან შედარებით, წელს აივ ინფექცია/შიდსის შემთხვევების მატების ტენდენცია ფიქსირდება; გამოვლენილია 67 ახალი შემთხვევა.

შიდსის ცენტრის ინფორმაციით, სულ პირველი შემთხვევიდან დღემდე საქართველოში ვირუსით ინფიცირების 2 602 შემთხვევაა რეგისტრირებული. ინფიცირებულთაგან 1 920 მამაკაცია, 682 – ქალი. პაციენტთა უმრავლესობის ასაკი 29-დან 35 წლამდეა. შიდსით დაავადებულთა 57.6% ნარკოტიკების ინიექციური მომხმარებელია. 35.8% ჰეტეროსექსუალური კონტაქტის შედეგად დაინფიცირდა, 2.8% - ჰომო/ბისექსუალური გზით, 2.3 % - ვერტიკალური გადაცემის გზით; 0.5% სისხლის რეციპიენტია; 1.0%-ის ინფიცირების გზა კი დაუდგენელია. აღსანიშნავია, რომ აივ ინფექცია/შიდსის ყველაზე მეტი შეთხვევები თბილისშია.