საქართველო, 5 თებერვალი, საქინფორმი. საქართველოს პრემიერ-მინისტრის სპეციალური წარმომადგენელი რუსეთთან ურთიერთობის საკითხებში ზურაბ აბაშიძე სოჭის ოლიმპიადაზე სამხრეთ ოსეთის დე ფაქტო ხელმძღვანელის ლეონიდ თიბილოვის ოფიციალურად მიწვევასთან დაკავშირებით გავრცელებულ ინფორმაციას არ ადასტურებს. ამის შესახებ მან დღეს გამართულ ბრიფინგზე განაცხადა და აღნიშნა, რომ არც რუსეთის საგარეო უწყებამ და არც საერთაშორისო ოლიმპიურმა კომიტეტმა აღნიშნული ინფორმაცია არ დაადასტურა.

„გუშინ გავრცელდა ინფორმაცია იმის შესახებ რომ სამხრეთ ოსეთის დე ფაქტო ხელმძღვანელი მიწვეულია ოფიციალურად სოჭის ოლიმპიადაზე. სამწუხაროდ არალეგიტიმური რეჟიმის პრესსამსახურის სრულიად უცნობი ხელმძღვანელის ეს განცხადება ძალიან სწრაფად აიტაცა ჩვენი პოლიტიკური სპექტრის წარმომადგენელთა ერთმა ჯგუფმა და გააკეთეს ძალიან სწრაფად გაუაზრებელი, ძალიან ნაჩქარევი განცხადებები.

ჩვენ, რა თქმა უნდა, გადავამოწმეთ ეს ინფორმაცია. რუსეთის საგარეო საქმეთა სამინისტრომ, ისევე როგორც საერთაშორისო ოლიმპიურმა კომიტეტმა კიდევ ერთხელ დაგვიდასტურეს, რომ სოჭში მიწვეულნი არიან ოფიციალურად მხოლოდ იმ ქვეყნების სპორტსმენები და წარმომადგენლები, რომლებიც მონაწილეობენ ოლიმპიურ თამაშებში“, – განაცხადა ზურაბ აბაშიძემ, რომლის თქმითაც, "ოლიმპიური კომიტეტისა და რუსეთის საგარეო უწყების ეს კომენტარი იმის დადასტურებაა, რომ საქართველოს ხელისუფლების გადაწყვეტილება სოჭის ოლიმპიადაში მონაწილეობასან დაკავშირებით სწორია“.