საქართველო, 28 იანვარი, საქინფორმი. სახელმწიფო ბიუჯეტიდან, მართლმადიდებელი ეკლესიის გარდა, კიდევ ოთხი კონფესია დაფინანსდება - მუსლიმანური, გრიგორიანული, კათოლიკური და იუდაიზმი. ამის შესახებ პრემიერ-მინისტრმა ირაკლი ღარიბაშვილმა მთავრობის გუშინდელ სხდომაზე განაცხადა და აღნიშნა, რომ ისინი იმავე პრინციპით დაფინანსდებიან, რა პრინციპითაც საქართველოს მართლმადიდებელი ეკლესია ფინანსდებოდა. შეგახსენებთ, რომ დღემდე სახელმწიფო ბიუჯეტიდან თანხას - წელიწადში 25 მლნ ლარს მხოლოდ ქართული მართლმადიდებელი ეკლესია იღებდა.

"'ხშირად გვესმის ოპოზიციისგან, რომ ჩვენი მთავრობის პერიოდში გახშირდა კონფლიქტები რელიგიურ ნიადაგზე, რაც კატეგორიულად არ შეესაბამება სიმართლეს. ჩვენ გვაქვს თანაბარი პატივისცემა სხვადასხვა რელიგიის მიმართ. ამის დატურია ის, რომ დღეს გამოგვაქვს საკითხი, რომელიც შეეხება 4 რელიგიური მიმართულების დაფინანსებას ბიუჯეტიდან. ეს დაფუძნებული იქნება იგივე პრინციპზე, რომლითაც ვაფინანსებთ მართლმადიდებელ ეკლესიას",- განაცხადა ღარიბაშვილმა, რომელსაც არ დაუკონკრეტებია, თუ რა ოდენობის თანხით დაფინანსდება აღნიშნული კონფესიები, თუმცა აღნიშნა, რომ თანხა ბიუჯეტიდან გამოიყოფა და ის პროპორციულად გადანაწილდება.